Qendra Kombёtare e Librit dhe Leximit, në bashkëpunim me Ambasadën Gjermane dhe “Tetorin Gjerman”, organizoi sot aktivitetin “Përkthimi përtej Kufijve – In Memoriam – Përkthyesit Gjermanisht – Shqip”, nё përkujtim dhe nderim tё veprës së katër përkthyesve të gjermanishtes: Skënder Luarasi, Afrim Koçi, Robert Shvarc, Ardian Klosi.
Në aktivitet ishte i pranishëm zoti Enrico Günther, Drejtues i Sektorit të Kulturës dhe Shtypit pranë Ambasadës Gjermane, i cili e vlerësoi këtë aktivitet “In Memoriam” të organizuar nga QKLL-ja, për misionin e këtyre katër figurave të rëndësishme të përkthimit në kulturën letrare shqipe, si dhe studiues dhe përkthyes të gjuhës gjermane.
