Alda Bardhyli
Alda Bardhyli ka kryer studimet universitare në Fakultetin e Histori-Filologjisë, dega Letërsi, UT. Ka nisur punën si gazetare e kulturës në vitin 2000 në gazetat “Albania” dhe “Dita”, ndërsa më pas ka qenë redaktore e kulturës në gazetën “Shqip”. Bardhyli ka punuar për 10 vite si korrespondente nga Shqipëria për gazetën “Koha Ditore”, duke përcjellë intervista, analiza e raportime mbi politikën, ekonominë dhe kulturën.
Në vitin 2009, emërohet si drejtore e Botimeve “55”, duke dhënë kontributin për të sjellë në gjuhën shqipe vepra dhe autorë të rëndësishëm të mendimit politik e historik. Në vitin 2014 punon si drejtuese e shtëpisë botuese “Saras”, një ent botues i cili kishte në fokus letërsinë bashkëkohore, dhe e mban këtë post deri në vitin 2017. Po në këtë vit ajo emërohet Drejtore e Botimeve “UET PRESS” si dhe e Institutit të Studimeve “Kadare” pranë Universitetit Europian të Tiranës. Ajo është gjithashtu lektore e Semiotikës në UET.
Alda Bardhyli është autore e shumë shkrimeve kritike dhe letrare me në fokus librin dhe kulturën, si edhe organizuese e aktiviteteve publike kushtuar librit. Ajo është redaktore e mbi 50 librave artistikë, studimorë dhe historikë të autorëve të rëndësishëm të letërsisë botërore, por edhe asaj shqipe.
Prej vitit 2020 është anëtare e Këshillit të Botimit të Akademisë së Shkencave të Shqipërisë. Ka qenë anëtare jurie në konkurse kombëtare e ndërkombëtare si:
“Çmimet Kombëtare Letrare për vitin 2019” (Kryetare jurie); “Tirana International Film Festival” (2016); Çmimi “Ardian Klosi” (2016); Çmimi letrar “Kadare” (2019); Çmimi “Vexhi Buharaja” (2021). Bardhyli është gjithashtu edhe anëtare e Këshillit të Filmit të animuar, pranë Qendrës Kinematografike (2017-2020)
Ndër botimet me autorësinë e Alda Bardhylit përmendim:
- “Letërsia e turpit” (Studime), UET PRESS
- “Maks Velo – Jetë paralele” (Botimi i dosjes së përndjekjes së artistit nga Sigurimi, shoqëruar me një bisedë mbi artin nën diktaturë) – UET PRESS;
- “Adrian Civici, dialog në tri kohë” – Onufri;
- “Një dialog i pambaruar me Kim Mehmetin” –Logos-A;
- “Kohë për rrëfim – Dialog me Ismail Kadarenë” – Onufri.
Ndër librat e përkthyer: “Një dashuri transatlantike”, Simone De Beauvoir.
